Verkefnaskrá Vaxtarsamnings

Verkefni tengd Vaxtarsamningi eru annars vegar skýrslur og samningar sem getið er undir flipanum "Vaxtarsamningur Vesturlands" og hins vegar einstök verkefni sem Vaxtarsamningurinn hefur styrkt eða stofnað til. Listi yfir þau verkefni er hér að neðan.

Fræðsla og upplifun heima á bæ

Samstarf býlana á Bjarteyjarsandi og Erpsstöðum og Landbúnaðarháskóla Íslands um þróun á fræðslu- og kynningarefni fyrir landbúnaðartengda ferðaþjónustu.

Matvælatengd ferðaþjónusta

Vaxtarsamningurinn er þátttakandi (án fjárframlags) í Öndvegisverkefni sem leitt er af Matís um þróun matvælatengdrar ferðaþjónustu.

Act Cool West Iceland

Samstarf veitingahúsa og matvælaframleiðslufyrirtækja á Vesturlandi og Vestfjörðum við samsvarandi aðila í Grænlandi og Færeyjum um þróun og kynningu staðbundinna matvæla.

FabLab á Akranesi

Samstarf um uppsetningu FabLab verkstæðis í tengslum við Fjölbrautarskóla Vesturlands á Akranesi. Unnið er að því að tryggja fjármagn til verkefnisins.

Lambið mitt

Samstarf um markaðssetningu á Vestlensku lambakjöti á netinu.

Litlu búðirnar á netinu

Vefverslun sett upp sérstaklega til markaðssetningar á vestlensku handverki og hönnun.

Sprotinn - atvinnusmiðja

Frumkvöðlasetur Landbúnaðarháskóla Íslands sem sérhæfir sig í aðstoð við frumkvöðla og nýsköpunarverkefni á sviði hagnýtra lífvísinda og líftækni.

Körfuboltaakademia Borgarness

Verkefnið gengur út á samstarf Menntaskóla Borgarfjarðar og nokkurra aðila í Borgarnesi um stofnun körfuboltaakademíu við skólann.

Komdu í land

Á hverju ári kemur nokkur fjöldi skemmtiferðaskipa til Grundarfjarðar. Verkefnið gengur út á að koma á fót handverksmarkaði fyrir farþega skemmtiferðaskipa. Á markaðnum geti handverksfólk eða smáframleiðendur af öllu Vesturlandi komið og selt sína vöru.

Klasasamstarf í Neðribæ í Borgarnesi

Samstarf nokkurra ferðaþjónustuaðila og handverksfólks í gamla bænum í Borgarnesi. Markmiðið er að kynna Neðribæ sem áhugaverðan stað fyrir ferðamenn. Hluti af því starfi snýst um að stofna heimasíðuna www.vistitborgarnes.com.

Íslenski menningararfurinn á netinu

Verkefnið snýst um að þróa námskeið um fornsögur Íslands og bjóða þau erlendis í gegnum fjarnámsvef. Samstarfsaðilar eru: Símenntunarmiðstöð Vesturlands, Snorrastofa í Reykholti og hugbúnaðarfyrirtækið Nepal ehf. 

Náttúruháskóli unga fólksins

Klasaverkefni á vegum Landbúnaðarháskólans, framhaldsskólana á Vesturlandi og Norðuráls sem miðar að því að efla áhuga framhaldsskólanemenda á Vesturlandi á sviði náttúruvísinda.

Sjávarsafnið í Ólafsvík

Verkefnið gengur út á að hópur aðila bindst samtökum um að fjölga og viðhalda tegundasafni sjávardýra ásamt því að búa til fræðsluefni sem mun nýtast gestum og skólahópum.

Græna lónið

Klasaverkefni 20 aðila á Sunnanverðu Snæfellsnesi sem gengur út á að byggja upp baðlón með náttúrulegu heitu ölkelduvatni, að Lýsuhóli í Staðarsveit.

W-23

W-23 er samstarf fjögurra þekkingarsetra á Snæfellsnesi: Háskólasetri Snæfellsness, Náttúrustofu Vesturlands, Varar og Þjóðgarðsins. Nafnið, W-23, vísar til lengdargráðu svæðisins. Hópurinn hyggst vinna í sameiningu að kynningu á rannsóknatækifærum, aðstöðu og rannsóknum samningsaðila á náttúru Snæfellsness og Breiðafjarðar. Markmiðið er að fjölga störfum í þekkingartengdum verkefnum á Snæfellsnesi.

Vesturlandsstofa

Á vegum ferðaþjónustuklasans hefur verið unnið að stofnun Markaðsstofu Vesturlands. Viðskiptahugmyndin gengur út á að byggja á þeim grunni sem Upplýsinga- og kynningarmiðstöð Vesturlands er, en sameina starfsemina við starf Ferðamálasamtaka Vesturlands, All Senses og etv. fleiri aðila.

Breiðafjarðarfléttan

Samstarfsvettvangur ferðaþjónustuaðila hringinnn í kring um Breiðafjörð. Hópurinn sótti um sameiginlega til Vaxtarsamnings Vestfjarða og Vaxtarsamnings Vesturlands og fékk stuðning frá báðum aðilum.

Þekkingarklasi Vesturlands

Þekkingarklasi Vesturlands er samtök sem eru vettvangur fyrirtækja, stofnana, einstaklinga og félaga í þekkingartengdri starfsemi á Vesturlandi. Hlutverk Þekkingarklasa Vesturlands er að:

• Stuðla að samstarfi og tengslamyndun meðal aðila í þekkingartengdri starfsemi á Vesturlandi.

• Vinna að sameiginlegum hagsmunamálum fyrirtækja og stofnana í þekkingartengdri starfsemi á Vesturlandi.

• Vinna að almennri kynningu á þekkingartengdri starfsemi á Vesturlandi og leita leiða til að auka sýnileika hennar.

• Stuðla að samstarfi við hliðstæð samtök innanlands og erlendis.

Matvælaklasi Vesturlands

Matvælaklasinn er samstarfsverkefni fyrirtækja og stofnana í matvælageiranum; aðallega veitingahúsa og matvælaframleiðenda.

Frumkvöðlasetur Vesturlands

Frumkvöðlasetrið er samstarfsverkefni Háskólans á Bifröst, Landbúnaðarháskóla Íslands, Borgarbyggðar, Sparisjóðs Mýrasýslu og SSV-Þróun og ráðgjöf. Markmiðið er að reka frumkvöðlasetur í tengslum við starfsemi atvinnuráðgjafarinnar og víðar, ef ástæða þykir til.

Efling Stykkishólms

Verkefnið gengur út á samþjöppun upplýsinga um þá þjónustu sem í boði er í bæjarfélaginu með heimasíðugerð og upplýsingamöppu sem dreift verður í öll þau hús sem teljast frístundahús og eða eru til leigu. Vefurinn verður byggður upp myndrænt og auðvelt verður að finna allar þær upplýsingar um þjónustu sem í boði er í Stykkishólmi.

Hollvinasamtök Dalabyggðar

Samtökin eru stofnuð til að vinna að framfaramálum á sviði atvinnu- og menningarlífs á svæðinu, standa vörð um söguna, vinna að verkefnum sem snerta Dalabyggð og hlúa að svæðinu í framtíðinni.

Þróunarsetur Fjölbrautarskóla Vesturlands.

Styrkurinn er veittur til að að undirbúa stofnun þróunarseturs (eða fræðsluseturs) í málmiðnaði og málmtækni sem verður miðstöð fyrir fullorðinsfræðslu, rannsóknir og menntatengda starfsemi á því sviði og um leið samstarfsvettvangur fyrirtækja og menntastofnana (meðal annars verkfræði- og tæknideilda háskóla) á sviði málmiðnaðar og málmtækni.

Food and fun á landsbyggðinni

Vaxtarsamningar víðs vegar af landinu tóku höndum saman og styrktu verkefnið Food and fund á landsbyggðini.

Samráðsvettvangur atvinnulífsins á Vesturlandi

Markmið vettvangsins er að stuðla að því að atvinnustarfsemi á Vesturlandi sé samkeppnishæf á markaði viðkomandi og að tryggja áframhaldandi vöxt og fjölbreytileika atvinnulífsins. Starfið verður verkefnabundið og fjármagnað á grundvelli skilgreindra verkefna en aðild er í gegnum aðild að SA.

All senses group

All senses hópinn þarf varla að kynna en um er að ræða sjálfsprottinn klasa ferðaþjónustuaðila á Vesturlandi. Vaxtarsamningur Vesturlands samdi beint við klasann um að starfa sem ferðaþjónustuklasi fyrir samninginn. Heimasíða klasans er www.westiceland.is.